Kerejasama
entara IPT, agensi perintah ulih meri chara inovatif enggau meruan kena napi
pemar industri tu di Sarawak
"Entara bidang kerejasama ti dikelala nyengkaum ngaga jalai raya ba
kandang endur ti tusah baka ba tanah kerapa enggau bebukit, lebih agi di menua
pesisir ti begunaka pemansang infrastruktur ti manah agi."
Datuk Amar Douglas Uggah Embas
Sapit Premier Sarawak
BETONG: Opis Kereja Raya (JKR) Sarawak enggau Universiti Teknologi Mara
(UiTM) Pampang Sarawak besai potensyel ulih bekerejasama dalam mayuh bidang ti
beguna dalam industri konstruksyen, ku Sapit Premier Sarawak Datuk Amar Douglas
Uggah Embas.
Iya madahka, kerejasama strategik entara institusyen pelajar tinggi
(IPT) enggau agensi perintah baka nya ulih meri chara inovatif enggau meruan
kena napi pemar industri tu di Sarawak.
"Entara bidang kerejasama ti dikelala nyengkaum ngaga jalai raya ba
kandang endur ti tusah baka ba tanah kerapa enggau bebukit, lebih agi di menua
pesisir ti begunaka pemansang infrastruktur ti manah agi.
"Aspek ngurangka ungkus ngaga jalai raya mega siti agi bidang ti
beguna sereta ulih diserungkai begulai," ku iya ti mega Menteri
Infrastruktur enggau Pemansang Penyangkai Kapal.
Iya madahka pekara nya ba pengerami nerima penatai 56 nembiak UiTM
nyerumba 'Program JKR Sarawak Bersama Mahasiswa' ngena rambai jaku 'Future
Engineers in Action: JKR Sarawak Engineering Experience' ti diatur ba Rumah
Mendit, Penom Ulu Paku, Spaoh, ditu, sehari tu.
Tuju program nya ti diatur tiga hari, iya kena meri penerang ngagai
nembiak bidang injiniring, seni bina, enggau bidang ti bekaul pasal pekara ti
amat nyadi dalam industri konstruksyen.
Program tu mega nyengkaum ngabas taba konstruksyen jalai raya, ti sama
disempulang 26 injinir JKR baru ari serata nengeri.
Lebuh bejaku, Uggah meri jaku lalau ti ulih nyadika sanding penemu raban
nembiak lebuh tembu belajar sereta maya masuk industri konstruksyen.
Keterubah, ku iya, amat beguna ba raban nembiak ulih meretika budaya
lokal ba endur kereja.
"Sebedau kita ngepunka enda ngira bagi kereja, tuku ke dulu peranak
udah nemu sereta diberi penerang ti patut. Tu mantu kita bulih sukung enggau
kerejasama manah ari komuniti lokal.
"Tu mega mayuh nentuka pengelanchar projek ba kandang endur nya.
Sereta kita patut bisi penemu silik pasal gaya enggau situasyen ba palan kita
bekereja," ku iya.
Kelimpah ari nya, Uggah mega madahka nengah JKR Sarawak diatu dalam
proses bejalaika beberapa projek infrastruktur berega urung RM60 bilion ti
nyengkaum dipelanja perintah besai enggau nengeri.
Iya madahka ari penyampau nya, perintah nengeri dijangka bejalaika urung
RM36 bilion.
"Entara projek nya nyengkaum Jalai Besai Kedua (STR), Jalai tebing
tasik enggau 16 jematan besai.
"Nambah nya, kitai bisi beberapa projek jalai raya ari baruh
sembilan agensi pemansang wilayah," ku iya.
Sama bisi datai ba pengerami nya, Kaban Parlimen Betong, Dato Dr Richard Rapu; Direktor JKR Sarawak, Dr Cassidy Morris; Rektor UiTM Sarawak Profesor Dr. Firdaus Abdullah enggau sida ti bukai.
Kredit: Utusan Borneo Online